Ökumaður vörubifreiðar, sem valt á Suðurlandsvegi undir Ingólfsfjalli laust fyrir klukkan níu í morgun, slapp að mestu ómeiddur er bifreiðin fauk á hliðina þegar sterk vindhviða skall á henni við brúna að Þórustaðanámu.
Frá þessu greinir varðstjóri hjá lögreglunni á Suðurlandi í samtali við mbl.is.
Bifreiðin er enn á veginum og verður fjarlægð þegar veðurhamurinn gengur niður. Loka þurfti veginum á tímabili vegna óhappsins en hann var opnaður á nýjan leik á ellefta tímanum.