Rúnar Pálmason, upplýsingafulltrúi Landsbankans, segir enga ákvörðun hafa verið tekna um að gefa starfsmönnum bankans sumargjöf.
Í samtali við mbl.is kveðst Rúnar ekki muna til þess að starfsmönnum hafi verið gefnar peningagjafir í sumar- og haustgjafir þó að hann muni til þess að starfsmenn hafi fengið litlar tækifærisgjafir líkt og vatnsbrúsa.
Aftur á móti staðfestir hann að starfsmenn hafi fengið 200 þúsund krónur greiddar til viðbótar við kjarasamningsbundna desemberuppbót fyrir jólin í fyrra.
Umfjöllun mbl.is hefur vakið athygli í dag, um að Íslandsbanki gefi starfsfólki sínu 100 þúsund krónur í sumargjöf.
Haraldur Guðni Eiðsson, upplýsingafulltrúi Arion banka, staðfestir einnig að ekki séu áform um að gefa starfsmönnum bankans sumargjafir.
Spurður hvort almennt tíðkist að gefa slíkar gjafir segir Haraldur enga reglu á því. Séu sumar- eða haustgjafir gefnar sé það tilfallandi.