Segir Seðlabankann geta gert betur

VIÐSKIPTI  | 18. mars | 9:55 
Seðlbankinn mætti sinna uppfræðsluhlutverki sínu betur gagnvart almenningi og dregið þar með úr tortryggni í garð bankakerfisins. Þetta er mat Ásdísar Kristjánsdóttur, aðstoðarframkvæmdastjóra Samtaka atvinnulífsins.

Ásdís Kristjánsdóttir, aðstoðarframkvæmdastjóri Samtaka atvinnulífsins veltir upp spurningum um hvað valdi því að mikil tortryggni hafi verið viðvarandi meðal almennings í garð bankakerfisins allt frá því að það hrundi með brauki og bramli í árslok 2008. Spyr hún hvort Seðlabankinn beri hluta ábyrgðarinnar.

„Ég hef ekki orðið vör við að Seðlabankinn sé að  stíga mikið inn í þessa umræðu núna, ég er ekki að meina að Seðlabankinn eigi að skipta sér af því hvernig umræðan eigi að snúast um söluna á Íslandsbanka. Mér finnst samt sem áður að Seðlabankinn eigi að gegna ákveðnu fræðsluhlutverki um þessa umgjörð og hvaða breytingar hafa átt sér stað á þessum 10 árum. Ég sakna þess svolítið að Seðlabankinn stígi ekki svolítið inn í þessa umræðu, bara sem kennari eða fræðari.“

Bendir Ásdís á að Seðlabanki Nýja-Sjálands og Englandsbanki standi mjög framarlega á þessu sviði. Segir hún að þeir sinni fræðsluhlutverki sínu mjög vel.

„Ekki aðeins því sem snýr að fjármálastöðugleika eða bankakerfinu heldur einnig peningastefnuninni og annarri starfsemi sem tengist starfsemi seðlabanka.“

 

 

Gylfi Magnússon, prófessor, sem er formaður bankaráðs Seðlabankans, bendir á að traust til Seðlabankans og Fjármálaeftirlitsins hafi hrunið eftir bankaáfallið 2008. Sú staða hafi hins vegar breyst hratt síðustu misserin og því séu þessar stofnanir mögulega fyrst núna í stakk búnar til þess að rísa undir þessu fræðsluhlutverki sem Ásdís gerir að umtalsefni.

Ásdís og Gylfi eru gestir Stefáns Einars Stefánssonar, fréttastjóra viðskipta á Morgunblaðinu í þættinum Dagmálum.

Dagmál eru þættir sem aðgengilegir eru öll­um áskrif­end­um Morg­un­blaðsins og má nálg­ast þá á mbl.is.

Hægt er að horfa á þátt­inn í heild sinni hér.

Þættir