Óttast er að jarðskjálftinn kröftugi, sem gekk yfir suðausturhluta Tyrklands og nágrannaríkið Sýrland snemma á mánudaginn, hafi orðið tugum þúsunda að bana og valdið mikilli eyðileggingu í ýmsum borgum.
Þetta vitum við núna um hamfarirnar:
Hvar og hvenær
Fyrsti skjálftinn mældist 7,8 stig og reið yfir klukkan 4.17 að staðartíma, eða klukkan 1.17 að íslenskum tíma, þegar flestir lágu í fastasvefni. Hann varð á um 18 kílómetra dýpt skammt frá tyrknesku borginni Gaziantep, þar sem um tvær milljónir manna búa.
Honum fylgdi 7,5 stiga eftirskjálfti, auk fleiri minni skjálfta í kjölfarið.
Jarðskjálftarnir eyðilögðu heilu hverfin í stórum borgum í Tyrklandi og hinu stríðshrjáða Sýrlandi.
Milljónir manna hafa undanfarin ár flúið á þetta svæði vegna stríðsins í Sýrlandi og annarra átaka.
Mannfall
Yfir 11.200 manns hafa fundist látnir og þúsundir til viðbótar slasast. Fleiri hafa fundist látnir í Tyrklandi heldur en í Sýrlandi. Leit heldur áfram í rústum bygginga að eftirlifendum.
Eyðilegging
Mikil eyðilegging varð skammt frá upptökum skjálftans á milli borganna Kahramanmaras og Gaziantep, þar sem heilu íbúðablokkirnar voru í rúst.
Að sögn Tyrkja hafa yfir þrjú þúsund byggingar hrunið til grunna í sjö mismunandi héruðum, þar á meðal sjúkrahús. Frægt bænahús frá 13. öld hrundi að hluta til í héraðinu Maltaya, þar sem 14 hæða bygging með 28 íbúðum og 92 manns hrundi einnig.
Í færslum á samfélagsmiðlum mátti sjá ónýtan 2.200 ára gamlan kastala sem rómverskir herir byggðu í Gaziantep.
Sýrlenska heilbrigðisráðuneytið greindi frá eyðileggingu í héruðunum Aleppo, Latakia, Hama og Tartus.
Menningarmálastofnun Sameinuðu þjóðanna, UNESCO, varaði við því að tveir staðir á heimsminjaskrá hennar, sýrlenska borgin Aleppo og virki í tyrknesku borginni Diyarbakir hefðu orðið fyrir skemmdum og að þó nokkrir staðir í viðbót gætu hafa skemmst.
Alþjóðleg hjálp
Fjöldi samtaka og þjóða hefur boðið fram aðstoð sína, þar á meðal ESB, Sameinuð þjóðirnar, NATO, Bandaríkin, Kína og Rússland. Þrátt fyrir pólitíska spennu hafa bæði Grikkir og Svíar boðist til að hjálpa Tyrkjum. Íslendingar hafa einnig sent fólk á vettvang.
Alþjóðaheilbrigðismálastofnunin segir að jarðskjálftarnir gætu haft áhrif á allt að 23 milljónir manna og hefur hún heitið aðstoð til langs tíma.
