Ferskur snjór hæfur til átu

Óhætt er að borða hálfsdags gamlan snjó. Ef snjórinn er orðinn tveggja sólarhringa gamall er hins vegar best að láta hann kyrran liggja. Þetta er niðurstaða vísindamanna við Sapientia-háskólann í Trasilvaníu í Rúmeníu. 

Rannsóknin fór fram í fyrra og samkvæmt henni er vel óhætta ð borða snjó sem er hálfs dags gamall og öryggið eykst eftir því sem kaldara er. 

Vísindamennirnir söfnuðu snjó í almenningsgörðum og af hringtorgum í Miercurea Ciug í Mið-Rúmeníu í janúar og febrúar á síðasta ári. Snjórinn var settur í sótthreinsuð og innsigluð ílát og reynt var að rækta bakteríu og myglu í þeim. 

Niðurstaðan var sú að bakteríur voru ólíklegri til að dafna í snjó sem safnað var í janúar en í febrúar.

Sá sem fór fyrir rannsókninni segist hafa fengið hugmyndina að henni er hann sá börnin sín borða snjó. „Ég er ekkert sérstaklega að mæla með því að fólk borði snjó,“ segir hann í samtali við AP-fréttastofuna, „það sem ég er að segja er að þú verður ekki veikur ef þú borða smá snjó.“

• Blogga um frétt