Sólarvörn er ekki að skila þeim árangri sem fólk væntir að því er fram kemur í niðurstöðum nýrrar rannsóknar. En það er ekkert að sólarvörninni heldur hvernig hún er borin á, segir í niðurstöðu rannsóknarinnar sem unnin er af vísindamönnum við King's College í London.
Fræðilega séð ætti sólarvörn 15 (SPF) að vera nægjanleg til að koma í veg fyrir sólbruna en í raunveruleikanum ætti fólk að nota vörn 30 eða 50 til þess að vera öruggt um að brenna ekki, segir í rannsókninni.
Niðurstaða rannsakenda er að best sé að nota vörn 50 og gæta þess að nota nóg af henni. Á vef BBC er ítarlega fjallað um hvernig eigi að bera vörn á sig en í Bretlandi hefur verið mjög heitt og sólríkt undanfarnar vikur.
Þar segir að meðalmaður eigi að nota að minnsta kosti sex fullar teskeiðar af vörn í hvert skipti. Rúmlega hálf skeið fari á hvorn handlegg og annað eins á andlit, háls og eyru. Rúma skeið eigi að nota á hvorn fótlegg, brjóst og kvið og eins á bak.
Síðan mælir BBC með því að bera vörnina vel og vandlega á líkamann og alls ekki gleyma hliðunum. Helst eigi að bera vörnina á sig 15 til 30 mínútum áður en haldið er af stað út í sólina. Endurtaka skal smurninguna á tveggja tíma fresti og eins eftir hvert skipti sem farið er í sund. Það er ef vörnin er ekki vatnsheld.
Svo segir um sólbruna á vef embættis landlæknis:
Útfjólublá geislun, hvort sem hún kemur frá sólinni eða ljósabekkjum, er aðalorsök húðkrabbameina. Á Íslandi greinast yfir 300 manns með krabbamein í húð á hverju ári, þar af að meðaltali 50 manns með sortuæxli, sem er hættulegasta tegund húðkrabbameina. Besta forvörnin gegn húðkrabbameinum er að koma í veg fyrir sólbruna.