Hlýjasti áratugurinn síðan mælingar hófust árið 1850 stendur nú yfir, en áætlað er að næstu fimm árin verði ársmeðalhiti að minnsta kosti 1 stigi hærri en þekktist fyrir iðnbyltinguna.
Samkvæmt bresku veðurstofunni er einnig mögulegt að meðalhiti fari tímabundið hærra en 1,5 stig umfram almennan meðalhita á næstu fimm árum, sem þykir gefa alvarleg merki um loftslagsbreytingar.
Í viðtali við BBC segir Adam Schaife, yfirmaður langtímaspár hjá bresku veðurstofunni, að spárnar bendi til hraðrar hlýnunar. Um 10% líkur eru á því að hiti fari hærra en 1,5 stig yfir meðalhita tímabundið. Sú tala er þröskuldur sem getið er um í Parísarsáttmálanum og Sameinuðu þjóðirnar birtu í október skýrslu um langtímaáhrif slíkrar hlýnunar.
Vísindamennirnir sem unnu skýrsluna segja hana vera lokaviðvörun og miðað við núverandi þróun stefni í 3 stiga hlýnun innan nokkurra áratuga. Eigi hins vegar að takast að halda hlýnun jarðar undir 1,5 stigum sé þörf á „hröðum, víðtækum og fordæmislausum breytingum á öllum hliðum þjóðfélagsins“.