Risalax á land á Norður-Jótlandi

Lars Barrup með hænginn stóra við Storåen.
Lars Barrup með hænginn stóra við Storåen. Ljósmynd/Aðsend

Nokkrar laxveiðiár eru í Danmörku og gefa sumar þeirra oft mjög stóra laxa sem eru sjaldséðir hér á landi. Ein af þekktari ánum þar er Storåen á Norður-Jótlandi sem hefur löngum gefið fjölda stórlaxa á hverjum sumri.

Þannig var með með veiðimanninn Lars Barrup sem veiddi síðastliðinn laugardag 130 cm risahæng í Storåen skammt við bæinn Vemb. Fram kom að Lars hafi fengið á hænginn stóra á spún.  Ekki kom fram ummálið á þessum stóra laxi sem sleppt var að lokinni viðureign eins og reglur í ánni kveða á um. Geta má má ráð fyrir hafi vegið í það minnsta um 25 kíló eða um 50 pund. 

Til samanburðar vó Grímseyjarlaxinn svokallaði 24,5 kíló blóðgaður og var mældur 132 cm, en hann fékk Óli Bjarnason sjómaður í þorskanet 400 metra vestur af Grímsey þann 8. apríl árið 1957. Er það stærsti lax sem veiðst hefur við Ísland. 

Stærsti stangaveiddi lax á Íslandi veiddist þann 24. júní árið 1992 en það var niður­göngulax og kom á land í Bakká í Bakkaf­irði. Hafði laxinn dvalið allan veturinn í ánni og var því heldur rýr en mældist á lengdina 130 cm og var vó 21,5 kíló.

Þessi lax Lars Barrup er þó fráleitt stærsti lax sem veiðst hefur í Storåen því haustið 2016 fékk Simon Kast­up Shim­izu, 23 ára gamall háskólanemi 141 cm lax á við Holstebro sem einnig tók spún. Er það stærsti lax sem landað hefur verið í Danmörku.

Hátt hlutfall stórlaxa virðist vera í ánni og hefur í sumar mörgum löxum verið landað yfir 100 cm, þar af fjórir aðrir á bilinu 114 til 120 cm.

Mikið eftirlit er með veiði í Storåen og reglur uppfærðar á hverju sumri.  Á þessu sumri er heimilt að veiða 475 laxa í ánni fyrir neðan vatnsaflsvirkjun við Holstebro. Veiðitímabilið er frá 16. apríl til 15. október sem skiptast í 250 laxa sem eru undir 75 cm og 225 laxa sem eru yfir 75 cm. Til viðbótar við lax veiðist meðal annars sjóbirtingur og gedda. Skráningarskylda er á hverjum veiddum fiski og vel fylgst með því að menn sinni skráningu á afla og verður að skila inn skýrslu um veiðina fyrir miðnætti á veiðidegi.

Frá Storåen á svokölluðu Vemb-svæði.
Frá Storåen á svokölluðu Vemb-svæði. Ljósmynd/Aðsend
Sendu ábendingu um frétt
eða myndir á veidi@mbl.is
mbl.is