Tröllið í Silungabakka tók Dropann

Benedikt Magnússon með hænginn stóra úr Silungabakka í Víðidalsá. Hann …
Benedikt Magnússon með hænginn stóra úr Silungabakka í Víðidalsá. Hann segir allt hafa fallið með sér í þessari viðureign. Ljósmynd/Aðsend

Enn einn stórlaxinn kom á land úr Víðidalsá í gærkvöldi. Hann veiddist í Silungabakka sem er veiðistaður ofarlega á svæði eitt. Það var 104 sentímetra hængur sem tók fluguna Dropann hjá Benedikt Magnússyni. Græjurnar voru léttar. Stöng fyrir línu sex, fluga númer sextán og taumur uppgefinn sem ellefu punda.

Benedikt var að vonum kátur með fiskinn. „Ég held að lykillinn að því að ég setti í hann hafi verið að ég var svo slakur. Ég var ekki að leita að honum og átti í sjálfu sér ekki von á svona trölli á þessum stað. En þegar hann tók hreinsaði hann sig alveg þannig að ég sá strax hvað þetta var stór fiskur. Það fór ekkert á milli mála,“ sagði Benedikt í samtali við Sporðaköst.

Hér má sjá fluguna Dropinn. Þessi er númer sextán og …
Hér má sjá fluguna Dropinn. Þessi er númer sextán og dugði á stórlaxinn. Ljósmynd/BM

En hvaða fluga er þetta?

„Hún er ekkert ósvipuð Madeleine, nema að við blývefjum legginn þannig að hún fer örlítið niður. Við höfum veitt vel á þessa flugu í sumar og raunar fyrri ár.“

Þeir félagarnir nota Dropann mikið og eru nú staddir í Ásunum og þar er mikið líf og þeir hafa einmitt verið að setja í hann á Dropann.

Stórlaxastöngin í Víðidal

„Það féll allt með mér í þessari viðureign og var auðvelt að koma honum á dautt vatn til að þreyta hann. Ég endaði bara á að stranda honum og sporðtaka hann eftir um þrjátíu mínútur. Mér finnst þetta sérlega skemmtilegt þar sem ég setti þessa stöng síðast saman við Víðidalsá fyrir átta árum og þá fékk ég á hana 96 sentímetra hrygnu í Síðukrók. Þá var ég með míkró-hitch. Þetta er sannkölluð stórlaxastöng,“ sagði Benedikt og hló.

Þetta er annar 104 sentímetra laxinn sem veiðist í Víðidalsá á nokkrum dögum.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
102 cm Sogið Kristinn Örn 14. júlí 14.7.
100 cm Nesveiðar Grétar Þorgeirsson 12. júlí 12.7.
100 cm Blanda Tom Tynan 9. júlí 9.7.
105 cm Blanda Nigel Hawkins 8. júlí 8.7.
104 cm Svalbarðsá Viggó Júlíusson 6. júlí 6.7.
104 cm Nesveiðar Hugo 29. júní 29.6.
104 cm Nesveiðar Aron Pálmarsson 27. júní 27.6.

Skoða meira