Leirvogsá aftur til SVFR

Sporðaköst greindu frá því fyrr í þessum mánuði að Lax-á ehf., fyrirtæki Árna Baldurssonar, hefði sagt sig frá samningi um leigu á Leirvogsá. Þar með var áin á lausu en hafði, áður en Lax-á tók hana á leigu, verið undir hatti Stangaveiðifélags Reykjavíkur. Í sömu frétt var greint frá því að líklegast væri að SVFR tæki ána aftur á leigu. Það er nú frágengið og greindi Stangaveiðifélagið frá þessu á heimasíðunni í dag. Þar segir:

„Leirvogsá er komin aftur til Stangaveiðifélags Reykjavíkur en gengið var frá undirritun samnings þess efnis nú á dögunum. Það má með sanni segja að þetta eru gleðifréttir fyrir félagsmenn og velunnara árinnar. Verið er að skoða veiðifyrirkomulag fyrir næsta sumar og verður það auglýst nánar síðar,“ segir í frétt SVFR.

Ástæðan fyrir því að Lax-á lét ána frá sér áður en samningur var útrunninn, var að sögn Árna Baldurssonar að lítið hefði verið af bæði fiski og vatni í ánni þau þrjú ár sem hún var í sölu hjá Lax-á.

Nú er Leirvogsá sem sagt aftur komin til SVFR. 

• Blogga um frétt

Seinustu hundraðkallar sumarsins