Önnur risahrygna úr Sjálfheldu

Stærsti lax sem vitað er um í sumar veiddist í Jöklu fyrir austan. Það var 107 sentímetra hrygna sem veiddist í veiðistað sem heitir því áhugaverða nafni Sjálfhelda. Borgar Antonsson, eða Boggi Tona fór nýlega á þennan veiðistað og setti undir rauðan Elliða, hálf tommu túpu.

Eftir nokkur köst tók fiskur og Boggi Tona vissi strax að þetta var stórlax. Eftir mikið reiptog og hörku viðureign landað hann hrygnu sem mældist 100,5 sentímetrar. Boggi tók fast á henni og honum telst til að viðureignin hafi ekki verið meira en sex til sjö mínútur. Hrygnunni var sleppt.

Veiðin í Jöklu í sumar hefur verið með ágætum og síðasta vika skilaði hundrað löxum. Allt útlit er fyrir að Jökla slái met þetta sumarið. Hún er þegar komin í 559 laxa og mestur afli sem hefur verið skráður á einu sumri er 815 laxar árið 2015.

Súddi með 97 sentímetra hæng úr Hólaflúð í Jöklu. Ljósmynd/Aðsend

Með Bogga Tona í hollinu þegar hann landaði hrygnunni var foringinn Sigurður Staples, eða Súddi. Hann setti í og landaði glæsilegum hæng sem mældist 97 sentímetrar. Veiðistaðurinn var Hólaflúð sem er einn gjöfulasti staðurinn í Jöklu.

• Blogga um frétt

Seinustu hundraðkallar sumarsins