Sjóbirtingsslóðir að þiðna á ný

Síðustu dagar hafa verið býsna vorlegir og töluvert hefur hlýnað eftir hörkufrostkafla. Vorveiðin fraus að sama skapi og það var erfitt að fá birtinginn til að taka. En nú er þetta allt að komast í eðlilegt horf. 

Holl sem var að ljúka veiðum á Austurbakka Hólsár fékk þannig hlýnun yfir nótt að síðasta vaktin gaf sex fiska, en fram að því var hópurinn fisklaus. Í gær var kropp á Austurbakkanum og tökur frekar grannar. Nokkrum fiskum var þó landað.

Austurbakki Hólsár er mjög víðfeðmt svæði og nær frá Ármótum Þverár og alveg niður í sjó. Kolskeggur ehf. sem annast sölu veiðileyfa í Eystri-Rangá, Þverá og Affallið tók svæðið á leigu í fyrra og hefur endurnýjað innbú í veiðihúsi. Að sögn Jóhanns Davíðs Snorrasonar framkvæmdastjóra Kolskeggs eru bara seldar sex stangir í vorveiðinni þó að heimillt sé að selja tíu. „Það vantar ekki að það er rúmt um menn á þessu mikla vatnasvæði,“ sagði Jóhann Davíð í samtali við Sporðaköst.

Þá var ágæt veiði í Ytri-Rangá í gær og var sex birtingum landað á fjórar stangir.

• Blogga um frétt

Seinustu hundraðkallar sumarsins