Þessi stórvaxni hængur veiddist í Þjórsá í dag. Stefán Sigurðsson leigutaki segir að þetta sé stærsti lax sem hann og Einar Haraldsson veiðivörður viti um sem veiðst hefur á stöng í Þjórsá og að öllum líkindum næst stærsti lax sem nokkurn tíma hefur veiðst í hinni miklu Þjórsá.
Ef einhver þekkir stærðir og fjölda laxa þá er það Einar hann hefur frá 1960 fylgst með veiðinni í Þjórsá og skráð hana.
Laxinn mældist 99 sentímetrar og vigtaði 10,5 kíló segir Stefán. Veiðimaður er Þórunn Gísladóttir. „Hún mætti ólétt í vindbuxum, bara svona í heimsókn og sló alla veiðikallana út með því að fá þennan svaka fisk á maðk og flotholt í veiðistaðnum Huldu. Gísli Jóhannsson var að bjóða til sín fjölskyldunni og allir voru búnir að fá lax síðast þegar ég vissi og þar af eru allavega fjórir maríulaxar,“ upplýsti Stefán og sagði líka að fjórtán laxar væru komnir á land í dag og heildartalan í Urriðafossi væri að nálgast 140 fiska.
En þá er ekki öll sagan sögð. Á miðvikudag setti veiðimaður í fisk sem hann lýsti í eyru Stefáns eins og um eitthvað tröll hefði verið að ræða. Á endanum sleit þessi mikli fiskur. Stefán sagðist oft heyra svona sögur og alltaf væri gaman að því.
„Þegar Þórunn landaði fiskinum var í honum öngull og sökkur og þá er þetta væntanlega sami fiskur og veiðimaður missti fyrir tveimur dögum. Það er ekki hægt annað en að elska svona sögur,“ hló Stefán.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |