Landaði hundraðkalli í Suðurhöfum

Að landa hundrað sentimetra laxi á Íslandi er mikið ævintýri og allt þarf að ganga upp. Sömu sögu má segja af hinu sprettharða vöðvabúnti, Giant Trevally. Ólafur Vigfússon er einn af þeim sem stundar sjávarveiði á framandi slóðum, „Salt Water.“ Óli og kona hans, María eru nýkomin úr leiðangri frá Seychelles þar sem draumurinn um þann stóra rættist. Óli brást vel við því að senda skýrslu af ævintýrinu. 

„Við vorum að lenda eftir ævintýraferð til Farquhar kóralrifsins sem er eitt af mörgum í Seychelles eyjaklasanum.  Markmið okkar Maríu var að fókusa fyrst og fremst á konung fiskanna, Giant Trevally sem yfirleitt er kallaður GT eða einfaldlega Geet.

Við veiddum alveg ágætlega í þessari ferð og datt ég í lukkupottinn þegar ég landaði 92 og 105 sentímetra Geet sama daginn. 105 sentímetra fiskur er 52 til 54 pund samkvæmt kvarða sem notast er við. 

Það var frekar mikill vindur þennan dag og birtuskilyrði mesta hluta dagsins afleit.  Við María veiddum með Cameron, veiðileiðsögumanni frá Suður Afríku.  Síðasti veiðistaður dagsins var lítil sandeyja þar sem safnast gjarnan saman mikið af „baitfish“/beitufiski á aðfallinu og GT sækir mjög í.

Þegar við komum í land í eyjuna sáum við að stór torfa af baitfish var úti í öldunum og í fjarska sáum við tvo mjög stóra GT á leið að þessu veisluborði sem beið þeirra þar.  Við hlupum eins og fætur toga að þessum stað, hlupum beint út í sjóinn og út í öldurnar sem köstuðu okkur fram og til baka.  Eftir aðeins örfá köst tók annar þessara fiska fluguna mína, reif út línu og allt í keng.  Þegar maður setur í fiska af þessari stærð stjórnar maður engu fyrstu mínúturnar og því gríðarlega mikilvægt að vera með öflugasta mögulega búnað sem hægt er að fá.

Fiskurinn minn fór út á haf og hinn fylgdi honum eftir allan tímann. Eftir all langa baráttu sneri fiskurinn við og synti á fleygiferð í átt að landi svo ég varð að taka á það ráð að hlaupa sem fætur toga uppá fjörukambinn og inn eftir fjörunni því ég náði ekki að spóla línuna inn nógu hratt.  Allar flugur sem við notum í GT veiðar eru agnhaldslausar og því afar mikilvægt að það komi aldrei slaki á línuna. Ég náði svo að halda fiskinum nálægt landi en enn sem fyrr voru báðir fiskarnir saman hlið við hlið og ég náði ekki að koma mínum uppá grynningarnar fyrr en Cameron tók það til bragðs að kasta grjóti út í sjó. Við það komst hreyfing á þá og mér tókst að ná drekanum mínum inn á grynningar þar sem Cameron mætti og sporðtók hann. Það er óhætt að segja að hjartað hafi hamast allan tímann og mikill léttir við að sjá þennan stóra fisk sem ég var búinn að togast á við í æsispennandi baráttu nokkuð lengi.

Stöngin sem ég notaði í þessari baráttu er Hardy Zane, 9 feta stöng fyrir línuþyngd #11. Hjólið er frá Shilton í Suður Afríku en þau hjól þykja einhver þau áreiðanlegustu þegar þreyta þarf stórfiska. Línan er GT flotlína frá Rio, taumurinn 100 pund og flugan er Squid fluga sem Dean, annar veiðileiðsögumaður á Seychelles hannaði, hnýtti og gaf okkur en þessi fluga hefur nú gefið okkur 86, 92, 97 og 105 sentímetra fiska í vor en þessir fjórir vega frá rúmum 30 pundum til 54 punda.  Þessi fiskur er sá langsterkasti sem ég hef barist við og landað.  Það er ekki hægt að lýsa kraftinum og hraða þessara fiska fyrir þeim sem ekki hafa reynt en þessi vöðvabúnt komast á 60 kílómetra hraða.“

Svona hljómar lýsing Óla af þessari mögnuðu viðureign. GT getur orðið mun stærri en þetta. Hins vegar eru fiskar sem ná þessari stærð, hundrað sentímetrar eða lengri svo sjaldséðir að veiðimaður fær sérstaka viðurkenningu vegna þessa. Þannig var þessi draumafiskur Óla eini fiskurinn þessa vikuna sem náði hundrað sentímetrunum.

Það er óhætt að segja að veiðigyðjan hafi verið Óla í för í vor. Því fyrr á þessu ári landaði hann 97 sentímetra GT og svo bættust þessir tveir við núna.