Sá stærsti úr Þingvallavatni í vor

Erik með þennan líka stórglæsilega ísaldarurriða sem hann veiddi í …
Erik með þennan líka stórglæsilega ísaldarurriða sem hann veiddi í landi þjóðgarðsins á Þingvöllum. Þetta er sá stærsti úr vatninu sem sögur fara af í vor. Ljósmynd/Cezary

Sænski veiðimaðurinn Erik Cullin heimsótti Þingvallavatn í fyrsta skipti fyrir nokkrum dögum. Hann er afar reyndur veiðimaður og hefur veitt víða um heim. Hann var á höttunum eftir ísaldarurriða eins og svo margir sem heimsækja Þingvallavatn. Með honum í för var ísaldarurriðahrellirinn Cezary Fijalkowski sem hefur landað þeim mörgum í yfirstærð í vatninu.

Þeir félagar voru að veiða í landi þjóðgarðsins en nákvæm staðsetning liggur ekki fyrir. Þeir félagar voru að prufukeyra flugur sem eru í hönnun og eru nýjar af nálinni. Það verður ekki betur séð en þær eigi eftir að virka vel.

Cezary varð vitni að tökunni og segir hana hafa verið skammt frá landi. Giskar á einhverja fimmtán metra frá bakka. Fljótlega eftir að búið var að setja í fiskinn tók hann mikla roku og á örskammri stundu hafði hann rifið út 150 metra af línu, en þá róaðist hann og hægt var að lempa hann til baka.

Viðureignin stóð í góðar tuttugu mínútur og var hraustlega tekið á þessum stórfiski. Í sameiningu tókst að landa þessum urriða. Cezary lýsir fisknum þannig: „Ég hef séð marga stóra urriða úr Þingvallavatni og fiska í þessari stærð og jafnvel yfir hundrað sentímetra. En þetta er fallegasti fiskur sem ég hef séð úr vatninu. Hann var alveg hreint magnaður.“

Urriðinn var mældur 99 sentímetrar og hafa Sporðaköst ekki upplýsingar um svo stóran fisk úr Þingvallavatni það sem af er vori. Það er líka fátítt að þeir verði stærri en þetta. Erik var afar ánægður með kynni sín af vatninu og skyldi engan undra. Hann sagðist aldrei hafa séð slíkan urriða á sínum ferli.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
101 cm Vatnsdalsá Erlendur veiðimaður 29. september 29.9.
101 cm Eystri-Rangá Grzegorz Loszewski 27. september 27.9.
105 cm Hvítá við Iðu Katrín Tanja Davíðsdóttir 24. september 24.9.
101 cm Víðidalsá Jón Eðvald Halldórsson 22. september 22.9.
107 cm Grímsá Jón Jónsson 22. september 22.9.
101 cm Miðfjarðará Agnar Sigurjónsson 22. september 22.9.
101 cm Hvítá við Iðu Gunnar Pétursson 20. september 20.9.

Skoða meira

Fleira áhugavert
Fleira áhugavert