Félag Ratcliffes tekur Hafralónsá á leigu

Frá undirritun leigusamningsins. Neðri röð frá vinstri: Júlíus Þröstur Sigurbjartsson …
Frá undirritun leigusamningsins. Neðri röð frá vinstri: Júlíus Þröstur Sigurbjartsson frá Gunnarsstöðum, Guðmundur Vilhjálmsson, frá Syðra Lóni, Jóhannes Sigfússon frá Gunnarsstöðum og Helga Kristín Tryggvadóttir sölustjóri hjá Six Rivers. Efri röð frá vinstri: Þórður Úlfarsson frá Syðri Brekkum og Ævar R. Marinósson frá Tunguseli. Ljósmynd/SRP

Six Rivers Project, félag breska auðmannsins Jim Ratcliffe, hefur undirritað tíu ára leigusamning um veiðirétt í Hafralónsá. Samningurinn var undirritaður í gær á skrifstofu Langanesbyggðar. Veiðifélag Hafralónsár skipaði sérstaka samninganefnd þar sem áttu sæti fimm landeigendur og var það meðal annars gert til að koma fleirum að borðinu, en aðeins þrír skipa stjórn veiðifélagsins.

Helga Kristín Tryggvadóttir, sölustjóri Six Rivers Project leiddi ferlið fyrir hönd leigutaka og segir hún í samtali við Sporðaköst að ferlið hafi tekið nokkurn tíma en verið mjög opið og niðurstaða hafi verið mjög góð. Á félagsfundi þar sem greidd voru atkvæði um samninginn sögðu þrettán landeigendur já, einn sat hjá og einn greiddi atkvæði gegn samningnum.
„Ég er mjög þakklát landeigendum við Hafralónsá að sýna okkur þetta afdráttarlausa traust. Við erum öll spennt að fara í samstarf við veiðifélagið og landeigendur um uppbyggingu á ánni og hefja þar rannsóknir og stuðla að auknum framgangi Hafralónsár. Við teljum ána eiga mikið inni og við munum fara strax í hrognagröft og flutning á löxum í haust,“ sagði Helga Kristín í gær.

Frá Hafralónsá. Hún þykir ægifögur og jafnframt erfið yfirferðar þar …
Frá Hafralónsá. Hún þykir ægifögur og jafnframt erfið yfirferðar þar sem víða þarf að klöngrast niður í djúp gljúfur til að nálgast veiðistaði. Ljósmynd/NFJ


Nýtt sex hundruð fermetra veiðihús verður byggt við Hafralónsá í líkingu við húsin sem á reisa við Hofsá og Miðfjarðará í Bakkafirði. Hönnun og staðsetning liggur ekki fyrir en verður kynnt síðar.

Aðspurð hvort þetta muni leiða til hækkunar á verði á veiðileyfum sagði Helga Kristín að það myndi gerast. Leiguverð er nú hærra en verið hefur og mun verðið hækka en það verður gert í áföngum.

„Þetta er svo spennandi. Hafralónsá er einhver fallegasta laxveiðiá sem ég hef kynnst. Ég veiddi hana í fyrsta skipti í fyrra og hún heillaði mig gjörsamlega. Það verður mikið ævintýri að fara í þá uppbyggingu og rannsóknir sem kveðið er á um í samningnum.“

Nafn félagsins, Six Rivers Project vísar til ánna sex sem félagið ýmist á, að fullu eða að hluta eða er með á leigu. Þær eru; Selá og Hofsá í Vopnafirði. Sunnudalsá, Vesturdalsá og Miðfjarðará í Bakkafirði. Segja má að með leigusamning undirritaðan um Hafralónsá, standi félagið loks aftur undir nafni ef horft er í heiti félagsins. En Hafralónsá er þá sjötta áin sem félagið fóstrar. Áður fyrr var Tungulækur sjötta áin en átti svo sem ekki alveg samleið með áformum um rannsóknir og uppbyggingu á laxveiðiám.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
100 cm Miðfjarðará Theódór Friðjónsson 2. ágúst 2.8.
103 cm Laxá í Aðaldal Robert Taubman 31. júlí 31.7.
100 cm Laxá í Aðaldal Kristrún Ólöf Sigurðardóttir 24. júlí 24.7.
105 cm Laxá á Ásum Lord Falmouth 22. júlí 22.7.
103 cm Laxá í Aðaldal Nils Folmer Jorgensen 19. júlí 19.7.
102 cm Hrútafjarðará Oddur Rúnar Kristjánsson 17. júlí 17.7.
102 cm Jökla Nils Folmer Jorgensen 14. júlí 14.7.

Skoða meira