Liturinn sem er að trylla Pintrest

Fölbleikur hefur verið vinsæll í litavali og húsbúnaði um nokkurt skeið en ekki verið áberandi í eldhúsum. Nú er hins vegar tími bleiku eldhúsanna runninn upp og þau virðast vera að sprengja samfélagsmiðla. Hvert bleika eldhúsið á fætur öðru er lofað í hástert á hönnunarbloggum og myndasíðan Pinterest fyllist af guðdómlegum bleiktóna myndum. 

Litaframleiðandinn Pantone hefur framleitt hinn fullkomna lit samkvæmt sérfræðingum en það er Pantone 182 UP. Sá litur er þó ekki litur ársins samkvæmt fyrirtækinu en ár hvert gefur Pantone út lit ársins og árið 2018 er það nokkuð æpandi fjólublár sem ætti aldrei að sjást í neinu eldhúsi. 

Annað sem vekur athygli er að fólk virðist blanda gylltum og silfruðum heimilistækjum sem kemur merkilega vel út. Eitt sinn þótti það glæpsamlegt stílbrot og merki um karaktersubbu að blanda þessu tvennu saman en nú er öldin önnur og hönnun einkennist af meiri tilraunamennsku og blöndu af hinu og þessu. Gamalt og nýtt, heitt og kalt, gyllt og silfur.

Lengi lifir fjölbreytileikinn – og bleikt!