Vissir þú að rófur eru stundum nefndar appelsínur norðursins? Ástæðan er sú að þær innihalda mikið magn C-vítamíns en þær eru einnig ríkar að trefjum, steinefnum og A-vítamíni í formi karótíns. Þær eru hitaeiningasnauðar og henta einstaklega vel sem millimál fyrir bæði börn og fullorðna.
Geymsla
Rófur þarf að geyma í kæli. Besti geymsluhiti er 0-2°C. Rófum er hætt við að tapa vökva, því er best að sveipa þær plastfilmu eða geyma þær í poka.
Notkun
Rófur má nýta á ýmsan hátt, bæði hráar og soðnar. Þær eru skornar í sneiðar eða teninga til að nota í súpur eða pottétti. Einnig eru þær tilvaldar til að rétta krökkum að narta í. Soðnar gulrófur eru bornar fram í sneiðum eða teningum sem meðlæti eða hafðar í rófustöppu með saltkjöti, saltfiski og sviðum, svo eitthvað sé nefnt. Þær eru líka góðar með lambasteik eða „roast beef“ – þykkar sneiðar eru penslaðar með feiti og látnar í fatið síðasta klukkutímann í steikingunni.
Hægt er að fríska upp á sneiðar af linum rófum með því að leggja þær í ísvatn í 30 mínútur. Eitthvað af vítamínum tapast þó við þetta.
Má frysta rófur?
Rófur eru fáanlegar allt árið, þannig að ekki verður séð að þörf sé á að frysta þær. Auk þess henta rófur ekki til frystingar eins og þær koma fyrir, en hægt er að frysta þær sem stöppu eða í teningum. Þó er nokkuð víst að árangurinn verður ekkert sérstakur, því þær verða vatnskenndar og bragðvondar eftir frystingu í samanburði við ferskar rófur.
Hvaða hluta er hægt að borða?
Allt nema hýðið.