Vestmannaeyjar hlutu á dögunum tilnefningu til Emblu-verðlaunanna sem besti mataráfangastaður á Norðurlöndunum. Um er að ræða mikla viðurkenningu fyrir vel unnið starf hagsmunaaðila á eyjunum en á undanförnum árum hafa afar metnaðarfullir veitingastaðir litið þar dagsins ljós, þeirra á meðal Slippurinn og GOTT.
Mikil fjölbreytni er í veitingaflórunni í Vestmannaeyjum og má þar nefna brugghús, bakarí og fjölmörg matreiðslufyrirtæki auk fjölda veitingastaða. Áhersla er á að nota hráefni úr nærumhverfi og eru gæðin eftir því enda oft talað um að sérstaða eyjanna sé aðgangur að framúrskarandi hráefni.
Rekstraraðilar staðanna eru flestallir faglært matreiðslufólk og metnaðurinn fyrir að byggja upp góða veitingaþjónustu í heimabæ skín í gegn. Allir þessir staðir eru lítil fjölskyldurekin fyrirtæki sem gera alla þjónustu við viðskiptavini persónulegri. Umfjallanir um veitingastaðina hafa ratað í marga af stærstu fjölmiðlum heims á síðustu árum þar sem talað er um hversu magnað það sé að hægt er að reka staði af þessu tagi á eyju þar sem undir fimm þúsund manns búa. Einnig hafa verið gefnar út ótal bækur á mörgum tungumálum frá veitingastöðum í Vestmannaeyjum. Síðasta dæmið er að útgefandinn Phaidon gaf út bók á heimsvísu um veitingastað í Eyjum þar sem kafað er djúpt í matarsögu eyjanna og hráefnið sem fáanlegt er þar og í kringum þær.