Matur | mbl | 5.12.2023 | 11:00

Pítsa fyrir rómantískan kvöldverð

Rómantíska pitsan fyrir tvo. Ljósmynd/Berglind Hreiðars

Hér er á ferðinni ekta pitsa fyrir rómantískan kvöldverð sem kemur úr smiðju Berglindar Hreiðars uppskriftahöfundar hjá Gotterí og gersemar. Auðvitað má gera þessa pitsu við hvaða tilefni sem er en Berglind var í rómantískum hugleiðingum þegar hún útbjó þessa. Á pitsunni eru perur, brie ostur og karamelluhnetur sem eru fullkomin blanda og þið hreinlega verðið að prófa þessa dásemd, má líka fá sér pítsu á þriðjudögum.

Pítsa fyrir tvo

50 g pekanhnetur
50 g sykur
20 g smjör
1 stk. gott pitsadeig að eigin vali
5 msk. ricotta ostur
2 litlar perur
¾ brie ostur
4-5 hráskinkusneiðar
Filippo Berio balsamik gljái, eftir smekk
Ferskt timian eftir smekk
Ólífuolía eftir smekk
Salt, pipar og hvítlauksduft eftir smekk

Aðferð:

Byrjið á því að útbúa karamelluhnetur með því að saxa pekanhneturnar niður og bræða næst sykurinn á pönnu.
Setjið smjörið síðan á pönnuna áður en sykurinn fer að brenna, hrærið vel saman, lækkið hitann og blandið pekanhnetunum saman við. Leyfið hnetunum að drekka aðeins í sig karamelluna og hrærið vel.
Dreifið síðan úr hnetublöndunni á bökunarpappír og leyfið að storkna á meðan pizzan er undirbúin.
Hitið ofninn í 220°C og mótið pitsu sem fyllir nánast út í eina bökunarplötu.
Smyrjið ricotta osti yfir botninn og skerið perur og brie ost í sneiðar og raðið yfir pitsuna.
Penslið með smá ólífuolíu og kryddið eftir smekk.
Bakið í 17-20 mínútur eða þar til botninn fer að gyllast vel og pizzan er tilbúin.
Toppið með hráskinku, karamelluhnetum, balsamik gljáa og smá fersku timian.