Matur | mbl | 12.1.2024 | 14:00

Karen hans Björgvins Páls heldur stórmótspartí

Ríkidæmið hans Björgvins Páls Gústavssonar, eiginkona hans Karen Einarsdóttir og börnin, Emilía, Emma, Eva og Einar Leó, ætla að horfa á leikinn á skjánum í dag. mbl.is/Kristinn Magnússon

Fyrsti leikur íslenska handboltalandliðsins á EM fer fram í Munchen í dag, föstudaginn 12. Janúar, klukkan 17.00. Þjóðin fylgist með og er orðin spennt en fjölskyldur landsliðsmanna eru ekki síður spenntar og farnar að setja sig í stellingar að fylgja sínum mönnum eftir.

Eiginkona Björgvins Páls Gústavssonar landsliðsmanns í handbolta, Karen Einarsdóttir, ætlar að horfa á fyrstu tvo leikina heima og bjóða heim í stórmótspartí meðan fylgst er með leikjunum á skjánum. Karen og Björgvin eiga fjögur börn sem öll dýrka að fylgjast með pabba sínum á vellinum og hvetja hann til dáða.

Karenu finnst allra skemmtilegast að bjóða vinum krakka heim í partí þegar leikirnir eru sýndir í beinni og býður þá ávallt upp á kræsingar við hæfi. Hún er búin að ákveða hvað verður boðið upp á með leiknum í dag en það verður einn af hennar uppáhaldsréttum þessa dagana.

Horfa á fyrstu tvo leikina heima en síðan úti

Ætlar þú að fylgjast með eiginmanninum og strákunum okkar á EM heima eða fara út?

„Ég ætla að horfa á fyrstu tvo leikina heima, en svo ætlum við krakkarnir að fara út og sjá síðasta leikinn í riðlinum. Ef þeir komast áfram í milliriðilinn þá förum við með til Kölnar,“ segir Karen og er orðin afar spennt að komast út að fylgjast með sínum manni.

Áttu von á því að þeir komist áfram í keppninni?

„Já, ég hef fulla trú á þeim eins og alltaf. Held þeir eigi eftir að eiga gott mót, liðsheildin er frábær og þjálfararnir æðislegir svo þetta getur ekki klikkað.“

Uppáhalds stórmótspartíin að horfa á leikina með krökkunum

Býður þú í partí þegar leikir eru í gangi ef þú er heima?

„Já, stundum bjóðum við í smá partí en best finnst mér að horfa með krökkunum og jafnvel bjóða vinum þeirra að horfa með. Það eru uppáhalds stórmótspartíin mín.“

Býður þú á upp á kræsingar?

„Já, hvort sem við erum með gesti eða bara við fjölskyldan að þá erum við alltaf með mismunandi kræsingar. Snakk og súkkulaði er alltaf vinsælt og jafnvel að skella í eina eðlu. Stundum skerum við niður grænmeti með ídýfu eða poppum. Reynum að hafa fjölbreytni enda leikur annan hvern dag.“

Uppáhaldspartírétturinn hennar Karenar þessa dagana er bakaður Dalabrie með pekanhnetum og hann verður í boði meðan strákarnir spila fyrsta leikinn í dag. mbl.is/Kristinn Magnússon

Bakaður Dalabrie uppáhaldsrétturinn

Ertu til í að svipta hulunni af þínum uppáhaldsrétti sem á vel við þegar horft er á handboltaleik á skjánum?

„Þessa stundina er uppáhaldsrétturinn minn bakaður Dala Brie í ofni. Einfaldur og góður partíréttur sem maður fær ekki nóg af.“

Girnilegur bakaður ostur hjá Karenu sem freistar bragðlaukanna. mbl.is/Kristinn Magnússon

Bakaður Dalabrie með pekanhnetum

1 stk. Dalabrie ostur
Hlynsýróp eða agave-síróp eftir smekk
50 g pekanhnetur saxaðar
Saltað kex eftir smekk

Aðferð:

Byrjið á því að hita ofninn í 200°C hita.
Setjið Dalabrie í eldfast mót.
Stráið pekanhnetunum ofan á og í kringum ostinn og hellið svo hlynsírópi eða agave-sírópi (eftir því sem þið eigið í skápnum) yfir.
Bakið í ofni við 200°C í um það bil tíu mínútur.
Berið fram á skemmtilegan hátt og skreytið með hnetum og kexi að vild.