Matur | mbl | 3.3.2024 | 6:30

Unaðslegt bananabrauð

Bananabrauðið er unaðslega ljúffengt nýbakað borið fram með smjöri. Ljósmynd/Jana

Hvað er betra en að hefja daginn á unaðslega góðu og ylvolgu bananabrauði? Þegar við eigum banana sem eru komnir á síðasta snúning er tilvalið að skella í bananabrauð. Bananabrauðið er allra best ylvolgt með smjöri, þá bráðnar það í munni. Hér erum við með uppskrift að bananabrauði sem kemur úr smiðju Kristjönu Steingrímsdóttur, Jönu, sem veit fátt skemmtilegra en útbúa hollar og góðar kræsingar sem eiga við í öll mál. Uppskriftina gerði hún fyrir uppskriftasíðu Nettó.

Bananabrauð Jönu

2 bollar hveiti ( Jana notaði möndlumjöl, en frjálst að nota hvaða hveiti sem er)
½ bolli sykur
¼ bolli púðursykur
1 tsk. matarsódi
2 msk. hörfræ
½ tsk. salt
3 mjög þroskaðir, bananar, stappaðir vel (um 1 ½ bolli)
½ bolli grísk jógúrt
2 stór egg
¼ bolli fljótandi kókosolía
1 tsk. vanilla
½ bolli saxaðar valhnetur, pekanhnetur og/eða súkkulaðibitar

Aðferð:

Hitið ofninn í 170°C hita.
Setjið bökunarpappír ofan í eldfast brauðform (eða notið silíkon brauðform og sleppur þá bökunarpappírnum)
Hrærið saman hveiti, sykur, púðursykur, matarsóda, hörfræjum og salti í stórri skál.
Maukið banana með gaffli og hrærið við egg, gríska jógúrt, kókosolíuna og vanilluna í sér skál.
Bætið blautu hráefnunum við þurrefnin og hrærið þar til það hefur blandast saman.
Hrærið söxuðum hnetum og/eða súkkulaðibitum saman við og setjið í bökunarformið.
Bakið brauðið í 50 til 60 mínútur þar til tannstöngli sem stungið er í kemur hreinn út
Takið brauðið úr ofninum og leyfið því að kólna aðeins.
Berið síðan fram ylvolgt með smjöri og njótið.