Fastur liður á laugardagsmorgnum á matarvefnum eru uppskriftirnar úr Húsó-eldhúsinu sem njóta mikill vinsælda hjá lesendum. Að þessu sinni er það uppskrift að Húsó-skinkuhornunum sívinsælu og Marta María Arnarsdóttir skólameistari Hússtjórnarskólans segir þau bragðast dásamlega vel. Jafnframt bætir hún við að skinkuhornin séu fullkomin til að eiga í frysti til að taka með sér í nesti eða til að bjóða upp á þegar óvænta gesti bera að gerði. Tekur stutta stund að hitta þau í ofni og bera þau fram ylvolg. Síðan passar líka vel að gefa grunnskólabörnunum skinkuhornin í nesti, taka þau út að morgni og stinga þeim í nestisboxið og þau verða búin að þiðna þegar fyrsti nestistími hefst.
Falleg og gullinbrún nýkomin úr ofninum.
mbl.is/Kristinn Magnússon
Húsó- skinkuhorn
- 450 g hveiti
- ¼ tsk. salt
- 2 msk. sykur
- 2 ½ tsk. ger
- 2 ½ dl mjólk, ylvolg
- 50 g smjör, brætt
Aðferð:
- Velgið mjólkina og bræðið smjörið.
- Blandið gerinu saman við og látið standa í nokkrar mínútur.
- Þurrefnin hnoðuð saman við.
- Látið deigið hefast á volgum stað í 20-30 mín.
- Skiptið deiginu í 4 bita, fletjið hvern bita út í kringlótta köku og skerið hana í átta geira með kleinuhjóli.
Fylling:
- 130-150 g skinkumyrja
- Um það bil 1 ½ dl skinkukurl
Aðferð:
- Blandið saman skinkuamyrju og skinkukurli og skiptið jafnt á hvern geira og rúllið upp frá breiðari endanum.
- Penslið með eggi og setjið fræ eða rifinn ost ofan á, gott að láta hornin hefast í 10-15 mínútur.
- Bakað í 10-12 mínútur við 180°C hita og blástur eða þangað til þau eru gyllt.
- Berið fram ylvolg eða frystið til eigu.