Matur | mbl | 9.5.2024 | 6:30

Þessi sósa getur ekki klikkað

Kóríandersósa sem getur ekki klikkað, bragðbomba sem passar með nánast öllu. Ljósmynd/Sjöfn

Þessi kóríandersósa er í miklu uppáhaldi hjá mér og hægt er að para sósuna með næstum öllu sem hugurinn girnist. Hér er á ferðinni kóríandersósan að bestu gerð.

Hún er fullkomin með hvers kyns salötum, fiskréttum, falafel, kjúklingi, mexíkóskum mat, grænmetisréttum og fullkomin í taco og fajtasrétti. Síðan er hún frábær með grilluðum mat. Til að mynda prófaði ég sósuna með túnfisksteik, algjört sælgæti að njóta og líka með nautalundinni. Í þessari sósu eru engar mjólkurvörur né olíur, hún er glúten- og sykurlaus og án soja. Þessi sósa getur ekki klikkað.

Sósan passar vel með mexíkóskum réttum eins og taco og fatjas. Ljósmynd/Sjöfn

Kóríandersósa Sjafnar

¾ bolli kasjúhnetur (lífrænar enn betra)
½ bolli ferskt kóríander
1 stk. hvítlaukur, marinn (þessi í körfunum)
½ bolli vatn, má setja meira ef þurfa þykir
3 msk. ferskur límónusafi, nýkreistur úr límónu
2 -3 msk. avókadó
½ tsk. sjávarsalt
½ tsk. hvítlauksduft

Aðferð:

Byrjið á því að setja kasjúhneturnar í skál og hellið sjóðandi vatni yfir þær. Passið að vatnið nái yfir allar hneturnar.
Látið liggja í vatninu í klukkutíma eða í volgu vatni yfir nótt.
Hreinsið hneturnar og hellið vatninu af.
Bætið svo öllu hnetunum og öðru hráefni í blandara.
Blandið mjög vel þannig að sósan fái falleg áferð.
Ef hneturnar eru ekki að blandast nógu vel saman að ykkar smekk þá má bæta örlitlu af vatni saman við. Sósan á verða falleg græn á lítinn og mjúkri áferð.
Berið kóríandersósuna fram í fallegri skál eða kokteilglasi og skreytið með kóríanderblöðum.