Matur | mbl | 17.5.2024 | 6:00

Tómatsúpan sem Helga Þóra elskar

Helga Þóra Bjarnadóttir deildi uppskrift að einfaldri og bragðgóðri tómatsúpu á TikTok. Samsett mynd

Helga Þóra Bjarnadóttir, dóttir Bjarna Benediktssonar forsætisráðherra Íslands, deildi á dögunum fljótlegri uppskrift að ljúffengri tómatsúpu með fylgjendum sínum á TikTok. Súpuna útbjó hún fyrir kærasta sinn og vinkonu sem virtust alsæl með útkomuna.

Frétt af mbl.is

Brynjar og Helga Þóra eru nýtt par

Uppskriftin er einföld en bragðgóð og er tilvalin bæði sem hádegis- og kvöldverður. Þeir sem vilja taka réttin einu skrefi lengra geta borið hann fram með gómsætu súrdeigsbrauði.

Frétt af mbl.is

Súrdeigsbrauð sem allir ráða við að baka

Fljótleg tómatsúpa að hætti Helgu Þóru

Hráefni:

7 stk. ferskir tómatar
2 stk. laukur
1 stk. hvítur laukur
1 stk. hvítlaukur
2 stk. kjúklingakraftur (teningar)
1msk. tómatpúrra
500 ml rjómi
1 L vatn
Handfylli af ferskri basilíku
Salt og pipar eftir smekk (hægt að bæta við kryddum eins og timjan, oreganó, paprikukryddi)
Smjör
Olía

Aðferð:

Steikið hvítlauk upp úr smjöri og olíu og bætið teningum af kjúklingakrafti út í.
Skerið tómatana í báta og bætið út í ásamt lauki, basilíku, tómatpúrru, kryddblöndu að eigin vali og vatni.
Látið allt malla saman undir loki í 25 mínútur.
Notið töfrasprota eða matvinnsluvél til að mauka súpuna.
Bætið rjóma út í súpuna og látið malla í smá stund áður en súpan er toppuð með basilíkulaufum og borin fram.