Dagmál Hnitmiðaður frétta- og
dægurmálaþáttur Morgunblaðsins
Tjónið og sorgin er gríðarlegt
Umbúðalaust 22. júlí 2024

Tjónið og sorgin er gríðarlegt

Norsk yfirvöld lokuðu nánast fyrirvaralaust fjölmörgum af bestu laxveiðiám landsins í vor. Þetta kom eins og reiðarslag fyrir þúsundir veiðimanna víða að úr heiminum. Fjöldagjaldþrot blasa við mörgum rekstraraðilum og tjónið er margþætt og mikið. Árni Baldursson var staddur í Noregi þegar hörmungarnar dundu yfir. Sjálfur var hann að glíma við ömurlega stöðu þegar hann fótbrotinn skakklappaðist og þráaðist við í von um að geta veitt bestu ár Noregs. Á endanum var hann neyddur í röntgenmyndatöku sem leiddi í ljós að vinstri öklinn var mölbrotinn. Árni Baldursson ræðir þessar tvíþættu hörmungar sem hann gekk í gegnum í Noregi, í þætti dagsins. Klukkustund með Árna Baldurssyni er góð byrjun á vinnuvikunni.

Líkleg verklok þjóðarsjúkrahúss 2029
Umbúðalaust 10. júní 2024

Líkleg verklok þjóðarsjúkrahúss 2029

Einhver flóknasta, stærsta og kostnaðarsamasta framkvæmd sem íslenska ríkið hefur ráðist í er bygging þjóðarsjúkrahúss. Um er að ræða nokkrar byggingar og hefur ein þeirra, sjúkrahótel þegar verið tekin í notkun. Gunnar Svavarsson er framkvæmdastjóri opinbera hlutafélagsins sem stofnað var um verkefnið. Hann er gestur Dagmála í dag og fer yfir stöðu verkefnisins og áætluð verklok. Eins og fyrr segir er framkvæmdin flókin og er stuðst við aðstoð sérfræðinga frá mörgum löndum. Meðferðarkjarninn, hið eiginlega sjúkrahús og aðrar bygginar sem tengjast starfseminni verður tilbúinn í notkun árið 2029 gangi áætlanir eftir. Þegar talað er um flókna framkvæmd er rétt að hafa í huga verkefnið snýst líka um tækjakost sem að stórum hluta verður endurnýjaður. Þegar kemur að sjálfum flutningi á nýja Landspítala er það einnig flókið verkefni og sérfræðingar á því sviði munu aðstoða við skipulag og framkvæmd.

Ný vitneskja um pýramída, frummenn og landnám
Umbúðalaust 27. maí 2024

Ný vitneskja um pýramída, frummenn og landnám

Saga Heiðrúnar sem fannst látin í Hellisskúta í ríflega 600 metra hæð yfir sjávarmáli á Austfjörðum verður aldrei upplýst. Fornleifafræðingar vita þó ýmislegt um þessa ungu ríkulega búnu konu. Einn þeirra sem kom að fundi og uppgreftri Heiðrúnar er Sigurður Bergsteinsson fornleifafræðingur og verkefnastjóri hjá minjastofnun. Hann er gestur okkar í dag og ræðir fund Heiðrúnar, stöðu fornleifauppgraftrar í sumar ásamt nýjum stórmerkilegum uppgötvunum í tengslum við byggingu pýramídanna í Egyptalandi. Helstu fornminjarannsóknir í sumar fara fram við Fjörð í Seyðisfirði, Stöð í Stöðvarfirði og Odda á Rangárvöllum. Fjármagn til að sinna rannsóknum á þessu sviði er af mjög skornum skammti. Þannig var einungis hægt að afgreiða þriðjung umsókna um styrki til rannsókna í sumar. Úthlutað var um 80 milljónum en sótt um 255 milljónir.

Er guð til? En djöfullinn? Kraftaverk?
Umbúðalaust 16. maí 2024

Er guð til? En djöfullinn? Kraftaverk?

Nýkjörinn biskup Íslands, Guðrún Karls Helgudóttir ræðir lífið og tilveruna ásamt trúnni í þætti dagsins. Hún tekur formlega við embætti í byrjun júlí en vígslan verður í september. Séra Guðrún trúir á kraftaverk og hefur orðið vitni að slíku. Þá vill hún efla þjóðkirkjuna og að allir sem eru í henni og að þessu fjölmennasta samfélagi landsins beri höfuðið hátt. Hún ætlar að færa biskupsembættið nær þjóðinni og ætlar sér að setja upp skrifstofu í hverjum landshluta í eina viku á hverju ári. Hún hleypur maraþon reglulega og hefur gaman af að prjóna og lesa glæpasögur.

Sýna fleiri þætti