Fasteignaverð hefur sjaldan verið hærra en verðmiðinn á húsnæði í dag er þó ekki allstaðar fáránlega hátt. Það eru nokkur tækifæri til að kaupa eignir á lægra verði eins og sést á fasteignavef mbl.is. Eignir úti á landi eru víða ódýrari en á höfuðborgarsvæðinu. Einnig getur komið sér vel að vera handlaginn og gera upp eignir sem þarfnast smá ástar og umhyggjusemi.
Við Kirkjuveg 15 í Ólafsfirði er að finna litla og notalega íbúð sem nú er til sölu. Íbúðin er 53 fermetrar og á neðri sérhæð í tvíbýli. Það er ekki bara dásamlegt að búa í Ólafsfirði heldur er fjörðurinn gríðarlega vinsæll meðal vetrarútivistafólks og þangað sækir fólk hvaðanæva af landinu til að stunda útivist á veturna.
Af fasteignavef mbl.is: Kirkjuvegur 15
Það er ekki oft sem gefst tækifæri til að kaupa einbýlishús á innan við 15 milljónir en það er hægt á Raufarhöfn. Raufarhöfn er nyrst allra þorpa og þar stendur þetta 173 fermetra einbýlishús á tveimur hæðum. Í húsinu eru fimm svefnherbergi og tvö baðherbergi.
Af fasteignavef mbl.is: Ásgata 17
Um er að ræða þriggja herbergja neðri sérhæð í tvíbýli með sérinngangi. Íbúðin, sem er 62 fermetrar, er með tveimur svefnherbergjum og uppgerðu baðherbergi. Einn stærsti kosturinn við íbúðina hlýtur að vera staðsetningin en í næsta húsi er hið margrómaða súkkulaðikaffihús Fríðu. Kaffihúsið er skyldustopp þegar Siglufjörður er heimsóttur.
Af fasteignavef mbl.is: Túngata 38
Um er að ræða lítið krúttlegt raðhús sem stendur í elsta hluta Hólmavíkur en húsið var reist árið 1943. Eignin er 92 fermetrar með tveimur svefnherbergjum, stofu, eldhúsi og snyrtingu. Húsið er gult og grænt á litinn að utan og á eflaust eftir að líta vel út í hvaða lit sem er þegar nýir eigendur mála það.
Af fasteignavef mbl.is: Brunngata 5
Við sjávarsíðuna á Stokkseyri er 89 fermetra steinsteypt einbýlishús. Húsið þarfnast mikillar ástar og endurbóta. Það býður upp á mikil tækifæri fyrir handlagna og þá sem vilja taka að sér krefjandi verkefni. Búið er að rífa allt innan úr húsinu og stendur það sem einn geimur. Einnig er möguleiki á að rífa það og byggja nýtt hús í staðinn.