Katrín Tanja og Laich opinbera sambandið

Crossfit-stjarnan Katrín Tanja Davíðsdóttir og íshokkíkappinn Brooks Laich opinberuðu samband sitt á Instagram-reikningum sínum í gær, sunnudag. Bæði birtu þau mynd af sér saman úr nýafstaðinni Havaí-ferð sinni. 

„Lífið er betra með tveimur kókoshnetum og þessari uppáhaldsmanneskju minni,“ skrifaði Katrín Tanja við mynd af þeim tveimur að drekkar úr kókoshnetum. 

Greint var frá því í síðustu viku að Katrín Tanja og Laich væru í sambandi. Parið sást kyssast í lok Heimsleikanna í crossfit á sunnudag fyrir viku og flugu þau svo saman í í frí til Havaí. Þá birtu þau myndir hvort af öðru á samfélagsmiðlum sínum en ekki fyrr en nú birtu þau mynd af sér saman. 

Laich birti fallega mynd af þeim ganga til móts við hvort annað. „Ég skal ganga þína leið, þú gengur mína leið,“ skrifaði Laich undir myndina og vísaði þar í kántrílagið Meet in the Middle eftir Diamond Rio frá 1991.

Laich var áður kvæntur leikkonunni Julianne Hough en þau skildu vorið 2020.

Frétt af mbl.is

Katrín Tanja í sambandi með íshokkíkappa

• Blogga um frétt