Knattspyrnusamband Íslands, KSÍ, auglýsir laust til umsóknar starf yfirmanns knattspyrnumála en Guðni Bergsson formaður KSÍ lýsti því yfir þegar hann tók við formennskunni í febrúar á síðasta ári að hann ætlaði sér að koma þessu starfi á laggirnar.
Arnar Grétarsson, fyrrverandi þjálfari Breiðabliks, hefur oft verið nefndur sem sá aðili sem gæti tekið við þessu starfi en Arnar starfaði á sínum tíma sem yfirmaður knattspyrnumála hjá gríska liðinu AEK og hjá Club Brügge í Belgíu. Arnar sagði í viðtali við RÚV á dögunum að hafi hafnað tilboði um að taka við starfi yfirmanns knattspyrnumála hjá kýpverska félaginu APOEL Nicosia.
Á vef KSÍ segir:
• Yfirmanni knattspyrnumála ber að efla faglegt starf KSÍ á knattspyrnusviði sambandsins og heyrir undir framkvæmdastjóra.
• Ábyrgur fyrir samræmingu og framþróun á vinnubrögðum við þjálfun landsliða og ber að sjá til þess að sú þekking sem er innan KSÍ nýtist íslenskri knattspyrnu sem best.
• Vinnur að því að efla faglega þekkingu og framþróun á knattspyrnusviði sambandsins þannig að sviðið standist alþjóðlegan samanburð. Umsjón og eftirfylgni með markmiðasetningu því tengdri og vinnur að nýrri afreksstefnu sambandsins
• Yfirumsjón með samskiptum við aðildarfélög sambandsins og yfirþjálfara þeirra þegar kemur að eflingu og stuðningi við þeirra faglega starf.
• Starfar með landsliðsnefndum, fræðslunefnd og mótanefnd KSÍ ásamt öðrum fastanefndum eftir atvikum.
• Tengiliður við erlend knattspyrnufélög og önnur knattspyrnusambönd ásamt UEFA og FIFA.
• Fræðsludeild innan handar við skipulagningu viðburða og útgáfu fræðsluefnis í nafni KSÍ.
• Aðkoma að áætlanagerð og skipulagningu við rekstur landsliðanna ásamt ráðningu þjálfara KSÍ.
Hæfiskröfur:
UEFA A-gráða skilyrði, UEFA Pro æskileg
Hæfni í mannlegum samskiptum
Reynsla af þjálfun og/eða stjórnun
Leiðtogahæfileikar æskilegir
Góð þekking á íslenskri knattspyrnu
Góð tölvukunnátta nauðsynleg
Góð tungumálakunnátta
Umsóknir sendist á netfangið klara@ksi.is
Umsóknarfrestur er til og með 15. nóvember 2018.