KR vann fimmta leik sinn í röð í 1. deild kvenna í knattspyrnu, Lengjudeildinni, þegar liðið lagði Víking úr Reykjavík 2:1 á útivelli í dag. Með sigrinum fer KR upp í efsta sæti deildarinnar.
Guðmunda Brynja Óladóttir reyndist hetja gestanna. Hún kom KR yfir á 17. mínútu og var staðan 1:0 í hálfleik.
Eftir tæplega klukkutíma leik jafnaði Nadía Atladóttir fyrir Víkinga. Guðmunda Brynja skoraði svo sigurmark KR-inga á 73. mínútu.
Eftir að hafa tapað í fyrstu umferð deildarinnar hefur KR sem áður segir unnið fimm leiki í röð og er með 15 stig á toppnum.
Afturelding, sem er í öðru sæti með 13 stig eftir fimm leiki, getur þó endurheimt efsta sætið vinni liðið leikinn sem það á inni gegn Augnabliki á þriðjudaginn.