„Svona hefur þetta verið hjá okkur. Við gefum allt í leikina og í dag fannst mér við betra liðið en svo náum við ekki í úrslit,“ sagði svekkt Vesna Milivojevic, miðjukona serbneska landsliðsins í fótbolta, í samtali við mbl.is.
Serbía mátti þola 1:2-tap gegn Íslandi í seinni leik liðanna í umspili um sæti í A-deild næstu Þjóðadeildar. Vann Ísland einvígið 3:2 eftir 1:1-jafntefli í Serbíu. „Við vorum svo nálægt því í dag og mér finnst við eiga skilið að vera í A-deildinni,“ sagði hún.
Allegra Poljak kom Serbíu yfir á sjöttu mínútu, en Sveindís Jane Jónsdóttir og Bryndís Arna Níelsdóttir sneru taflinu við á síðasta korterinu.
„Við misstum einbeitinguna í lokin og gerðum mistök í vörninni. Mér fannst við spila mjög vel í þessum tveimur leikjum og við notum þetta í undankeppni EM. Við ætlum okkur á lokamótið.
Þetta eru auðvitað gríðarleg vonbrigði en við höldum áfram á okkar vegferð. Við getum unnið öll lið og við sýndum það þegar við unnum Þýskaland. Við þurfum að halda áfram þessari frammistöðu og ná í úrslit með,“ sagði hún.