Gæti verið síðasta tækifærið

Sverrir Ingi Ingason, varafyrirliði íslenska landsliðsins í knattspyrnu, vonast til þess að komast á sitt þriðja stórmót en það tekst ef Ísland sigrar Úkraínu í úrslitaleiknum í Wroclaw annað kvöld.

„Ég hef orðið þess heiðurs aðnjótandi að fara tvisvar á stórmót og þetta er eitthvað það skemmtilegasta sem ég hef tekið þátt í,“ sagði Sverrir á fréttamannafundi Íslands í Wroclaw í dag.

Frétt af mbl.is

Vitum hvers konar liði við mætum

„Það myndi gefa þessu landsliði svakalega mikið að fá slíka reynslu. Þetta er frábært tækifæri, við erum einum leik frá EM, og ég get lofað því við munum leggja allt í sölurnar á morgun til að ná okkar markmiðum.

Sem fótboltamaður veistu aldrei hve mörg slík tækifæri þú færð. Þetta gæti verið mitt síðasta tækifæri til að komast með landsliðinu á stórmót, og fyrir fleiri í liðinu. Margir aðrir eru rétt að byrja og við erum staðfráðnir í að nýta tækifærið. Þetta eru stærstu stundir fótboltamanns, að spila fyrir þjóð sína á stærsta sviðinu," sagði Sverrir.

Var í öðruvísi hlutverki

Spurður hvort leikurinn gegn Úkraínu væri einn alstærsti leikurinn á hans ferli, þrátt fyrir stórmótin tvö svaraði Sverrir að það mætti alveg færa rök fyrir því.

"Ég var í öðruvísi hlutverki á hinum mótunum, þá var ég að stíga mín fyrstu skref með landsliðinu, og það hjálpaði mér mikið á þeim tímapunkti á ferlinum að hafa fengið að taka þátt í báðum þessum verkefnum.

Í dag myndi svona stórmót gefa fullt af leikmönnum sem nú eru í sömu stöðu og ég var á þeim tíma tækifæri til að komast lengra á styttri tíma. Þetta eru leikirnir sem þú vilt spila sem fótboltamaður, það er allt undir, fullur völlur, og spilað upp á eitthvað sem skiptir öllu máli.

Við erum fullir sjálfstrausts og þurfum fyrst og fremst að trúa því sjálfir að við getum gefið Úkraínumönnum góðan leik á morgun," sagði Sverrir Ingi Ingason.

• Blogga um frétt