„Eins grátlegt og það gerist“

Stuðningsmenn Íslands í kvöld.
Stuðningsmenn Íslands í kvöld. Ljósmynd/Alex Nicodim

„Þetta var eins grátlegt og það gerist. Ég veit ekki hvernig á að lýsa því betur,“ sagði Jón Dagur Þorsteinsson í samtali við Stöð 2 Sport eftir 2:1-tap fyrir Úkraínu í úrslitaleik umspils um laust sæti á EM 2024 í kvöld.

Jón Dagur átti tvö stórhættuleg skot í leiknum en í bæði skiptin sá Andriy Lunin, markvörður Real Madríd, við honum með góðum vörslum.

„Mér leið allavega eins og það hafi munað litlu í leiknum. Ég á eftir að sjá það aftur en það var eins og hann væri búinn að lesa mig. Mér fannst alltaf vera mættur í hornið, ég veit ekki hvað það var,“ sagði hann um skotin tvö.

Fyrsta markið slappt

Ísland leiddi með einu marki í leikhléi en Úkraína jafnaði metin í byrjun síðari hálfleiks

Hvað gerðist í byrjun seinni hálfleiks?

„Það er kannski erfitt að segja til um það svona beint eftir leik. Ég er ekki búinn að sjá það en úti á velli leit fyrsta markið svolítið slappt út og það breytti leiknum.

En við vorum ennþá inni í þessu þegar það var 1:1. Svo kemur seinna markið og við búnir að eyða ótrúlega mikilli orku í að reyna að halda þessu þannig að það var það sem gjörbreytti leiknum,“ sagði Jón Dagur.

Seinna markið drap leikinn

Spurður hvort það hafi verið erfitt að gíra sig upp eftir annað mark Úkraínu seint í leiknum sagði hann:

„Já, algjörlega. Mér fannst það breyta leiknum helvíti mikið. Við vorum inni í þessu í 1:1 og framlenging og allt það eftir. Seinna markið drap leikinn að vissu leyti.“

Var um mest svekkjandi tap þitt á ferlinum að ræða?

„Já, já, hundrað prósent,“ sagði Jón Dagur að lokum.

mbl.is
Fleira áhugavert
Fleira áhugavert
Loka