Aukið áhorf á EM í Bandaríkjunum
Bandaríkjamenn horfa í auknu mæli á fótbolta.
AFP
Setja bókamerki
Meiri áhugi var fyrir Evrópumótinu í fótbolta í Bandaríkjunum núna en fyrir fjórum árum samkvæmt áhorfstölum sjónvarpsstöðvarinnar ESPN sem sýndi frá mótinu.
Ríflega fjórar milljónir Bandaríkjamanna horfðu á Spán rúlla Ítalíu upp, 4:0, í úrslitaleiknum en 3,7 milljónir horfðu á úrslitaleikinn fyrir fjórum árum sem þá var sýndur á sjónvarpsstöðinni ABC.
Ríflega 550.000 manns til viðbótar horfðu svo á leikinn í Bandaríkjunum í snjallsímum, ferðatölvum, spjaldtölvum eða Xbox leikjatölvum.
Að meðaltali horfðu 1,3 milljónir Bandaríkjamanna á hvern leik en það er aukning um 51 prósent frá þeim 859.000 sem horfðu á leikina fyrir fjórum árum.
