„Ótrúlegir hæfileikar“

Leiks Liverpool og Paris SG í 1. umferð riðlakeppni Meistaradeildar Evrópu í knattspyrnu er beðið eftir með mikilli eftirvæntingu en liðin eigast við á Anfield í kvöld.

Bæði lið hafa unnið alla fimm deildarleiki sína á tímabilinu og þau skarta bæði frábærum sóknarlínum, þeim allra bestu í heimi. Liverpool með Mohamed Salah, Roberto Firmino og Sadio Mané og Parísarliðið með Neymar, Kylian Mbappe og Edison Cavani.

Neymar og Kylian Mbappe, tvær af skærustu stjörnum Paris SG. AFP

Á síðustu leiktíð skoraði Salah 44 mörk í öllum keppnum, Firmino 23 og Mané 20. Hjá Paris SG skoraði Cavani 40 mörk, Neymar 26 og Mbappe 22. Líkurnar á að það verði mörk skoruð í kvöld eru því ansi miklar og kannski verður markaregn.

„Þetta á eftir að vera mjög erfiður leikur. Paris SG er eitt af bestu liðum heims svo við reiknum með mjög erfiðum en skemmtilegum leik á Anfield. Vonandi gerum við okkar besta og vinnum leikinn,“ segir Sadio Mané.

„Paris SG er eitt af sigurstranglegustu liðunum í Meistaradeildinni. Það er engin spurning með það. Þetta lið er byggt til að vinna Meistaradeildina og það eru ótrúlegir hæfileikar í því,“ segir Jürgen Klopp, knattspyrnustjóri Liverpool.

• Blogga um frétt