Ítalska knattspyrnufélagið Roma ætlar að selja sænska markmanninn Robin Olsen eftir leiktíðina, þar sem hann hefur ekki staðið undir væntingum. Olsen var keyptur til að fylla í það skarð sem Alisson skildi eftir sig er hann gekk í raðir Liverpool.
Olsen kom til Roma fyrir tímabilið frá FC Kaupmannahöfn, en hann hefur átt erfitt uppdráttar á leiktíðinni, eins og liðið sjálft. Claudio Ranieri tók við Roma fyrr í mánuðinum og stjórinn mundi ekki nafnið á markmanninum á fréttamannafundi á dögunum og lofaði hann engu um framtíð hans.
Að sögn ítalska miðilsins La Gazzetta dello Sport ætlar Roma að taka leikmannahópinn sinn í gegn fyrir næstu leiktíð. Olsen hefur verið orðaður við félög í ensku úrvalsdeildinni, en hann er sem stendur í landsliðsverkefni með Svíþjóð.