Knattspyrnumaðurinn David Silva hefur leikið sinn síðasta leik fyrir Manchester City í úrvalsdeildinni en Spánverjinn er 34 ára og mun leita að nýrri áskorun eftir Meistaradeildina en hann hefur verið tíu ár í Manchester.
Ítalskir fjölmiðlar hafa undanfarið sagt frá því að hann sé á leiðinni til Lazio og hefur faðir hans, Fernando, nú blásið byr undir þann orðróm. „Ég get staðfest að honum líkar vel við ítölsku deildina, hann myndi njóta þess að spila þar. Hann sagði mér að hann gæti spilað á Ítalíu til fertugs,“ sagði Fernando Silva í viðtali við El Transistor.
Hann spilaði 309 leiki fyrir City, varð enskur meistari fjórum sinnum með félaginu og er einn sigursælasti leikmaður deildarinnar. Silva hefur skorað 60 deildarmörk á Englandi en hann kom frá Valencia í heimalandinu árið 2010. Auk fjögurra Englandsmeistaratitla hefur hann orðið enskur bikarmeistari tvisvar og deildabikarmeistari fimm sinnum.