Alfons Sampsted og félagar í Bodö/Glimt náðu í kvöld átján stiga forystu í norsku úrvalsdeildinni í knattspyrnu þegar þeir sigruðu Íslendingaliðið Vålerenga á heimavelli, 2:0.
Alfons lék allan leikinn sem hægri bakvörður en lið hans hefur unnið 17 leiki og gert tvö jafntefli í 19 leikjum á tímabilinu og haft ótrúlega yfirburði í deildinni. Það er nú komið með 53 stig en næstu lið eru Rosenborg og Odd með 35 stig.
Vålerenga er með 32 stig í fimmta sætinu og átti möguleika á að ná Rosenborg og Odd með sigri í kvöld. Viðar Örn Kjartansson lék allan leikinn með Vålerenga og Matthías Vilhjálmsson kom inn á sem varamaður á 79. mínútu.
Axel Andrésson lék allan leikinn með Viking sem vann Mjöndalen 2:1 á útivelli. Dagur Dan Þórhallsson var varamaður hjá Mjöndalen.
Jón Guðni Fjóluson lék sinn fyrsta leik með Brann og spilaði allan leikinn þegar liðið gerði jafntefli, 1:1, við Kristiansund á útivelli.
Davíð Kristján Ólafsson var eini Íslendingurinn sem tók þátt í leik Aalesund og Rosenborg en Rosenborg vann þar 2:1 útisigur. Hólmar Örn Eyjólfsson var varamaður hjá Rosenborg, Davíð lék allan leikinn með Aalesund en Hólmbert Aron Friðjónsson og Daníel Leó Grétarsson voru ekki með vegna meiðsla.