Arsenal er komið í 32-liða úrslit enska bikarsins í fótbolta eftir 2:0-sigur á Newcastle á heimavelli í kvöld.
Newcastle fékk bestu færin til að skora í venjulegum leiktíma en Andy Carroll nýtti tvö úrvalsfæri illa. Hinum megin stóð Martin Dúbravka vaktina vel í marki Newcastle og var staðan eftir venjulegan leiktíma markalaus.
Fyrsta markið kom loks á 109. mínútu og það gerði varamaðurinn Emile Smith Rowe með skoti í stöng og inn úr teignum. Átta mínútum síðar bætti fyrirliðinn Pierre-Emerick Aubameyang við marki og tryggði Arsenal sigur.
Brentford úr B-deildinni er einnig komið áfram eftir 2:1-sigur á Middlesbrough og Plymouth úr C-deild er komið áfram eftir 3:2-sigur á útivelli gegn Huddersfield úr B-deildinni.