Liðsfélagi Íslendinganna með óvæntan hæfileika

Ensku knattspyrnukonunni Georgiu Stanway er greinilega margt til lista lagt. Auk þess að vera lykilmaður þýska stórliðsins Bayern München er hún liðtækur húðflúrari.

Stanway verður til viðtals í vefþættinum Out of office á Youtube-síðu BBC Sport í kvöld, þar sem hún ræðir um ástríðu sína utan knattspyrnunnar.

Í þættinum verður fylgst með því er Stanway húðflúrar aðra manneskju í fyrsta sinn.

„Að húðflúra er orðinn stór hluti af lífi mínu,“ sagði hún í kitlu fyrir þáttinn, sem má sjá hér.

Liðsfélagar Stanway hjá Bayern eru fyrirliðinn Glódís Perla Viggósdóttir og markvörðurinn Cecilía Rán Rúnarsdóttir, auk þess sem Karólína Lea Vilhjálmsdóttir er á mála hjá félaginu og leikur sem stendur á láni hjá Bayer Leverkusen.

• Blogga um frétt