Topplið Füchse Berlin vann Íslendingaliðið Balingen, sem situr á botni deildarinnar, með naumindum, 35:34, í þýsku 1. deildinni í handbolta í Berlín í dag.
Oddur Gretarsson átti magnaðan leik í liði Balingen en hann skoraði sjö mörk og var markahæstur maður liðsins. Daníel Þór Ingason skilaði einnig sínu en hann skoraði tvö mörk.
Balingen er í slæmum málum í botnsæti deildarinnar með 11 stig, fimm stigum frá öruggu sæti.
Gummersbach, undir stjórn Guðjóns Vals Sigurðssonar, vann þá góðan átta marka sigur á Stuttgart, 35:27, í Gummersbach.
Arnór Snær Óskarsson skoraði eitt mark en Elliði Snær Viðarsson komst ekki á blað.
Gummersbach er í sjöunda sæti deildarinnar með 28 stig.