Finnur Freyr Stefánsson, þjálfari Íslandsmeistaraliðs KR síðustu fimm árin í körfuboltanum, birti áhugavert tíst í gær þar sem hann lætur í það skína að margir hafi haft efasemdir við um Arnar Guðjónsson, þjálfari Stjörnunnar, myndi vinna bikar.
Undir stjórn Arnars varð Stjarnan bikarmeistari karla í gær þegar liðið lagði Njarðvík að velli í úrslitaleiknum en Njarðvík er í efsta sæti í deildinni og Stjarnan í öðru sæti.
Með þessum úrslitum þaggaði Arnar niður í mörgum efasemdarmönnum að sögn Finns.
Arnar Guðjónsson tók við Stjörnunni síðasta sumar en hann hafði búið í Danmörku í mörg ár og þjálfað þar.
Arnar og Finnur störfuðu saman í nokkur ár hjá íslenska landsliðinu sem aðstoðarþjálfarar Craigs Pedersen.
Virkilega flottur og vel útfærður bikarsigur hjá Stjörnunni. Minn maður @ArnarGud að þagga niður í ansi mörgum efasemdarmönnum, fagnar þessu eflaust í kvöld með soðinni ýsu, smjöri og auka skammti af kartöflum og kannski einsog einum bauk. Til hamingju @stjarnankarfa
— Finnur Stefánsson (@FinnurStef) February 16, 2019