Slóveninn Luka Doncic átti stórkostlegan leik fyrir Dallas Mavericks þegar liðið vann þægilegan sigur á Charlotte Hornets, 130:104, í NBA-deildinni í körfuknattleik í nótt.
Doncic var með þrefalda tvennu og stigahæstur í leiknum þegar hann skoraði 39 stig, tók 12 fráköst og gaf tíu stoðsendingar.
Dallas er í fimmta sæti Vesturdeildar með 49 sigra í 79 leikjum og er komið langt með að tryggja sér sæti í úrslitakeppni deildarinnar.
Kamerúninn Joel Embiid, sem mun þó leika fyrir landslið Bandaríkjanna á Ólympíuleikunum í París í sumar, átti ekki síður góðan leik fyrir Philadelphia 76ers í 120:102-sigri á Detroit Pistons.
Embiid skoraði 37 stig, tók 11 fráköst, gaf átta stoðsendingar, stal boltanum þrisvar sinnum og varði tvö skot.
Philadelphia er sem stendur í sjöunda sæti Austurdeildar og á enn möguleika á að komast í sjötta sæti, en liðin í sjöunda til tíunda sæti fara í umspil um hvaða tvö lið fara í átta liða úrslitakeppnina.
Úrslit næturinnar:
Charlotte – Dallas 104:130
Philadelphia – Detroit 120:102
Toronto – Indiana 123:140
Atlanta – Miami 111:117 (2xfrl.)
Milwaukee – Boston 104:91
Chicago – New York 117:128
Houston – Orlando 118:106
Memphis – San Antonio 87:102
Minnesota – Washington 130:121
Oklahoma – Sacramento 112:105
Utah – Denver 95:111
LA Lakers – Golden State 120:134
Phoenix – LA Clippers 92:105
Portland – New Orleans 100:110