Keyptu 30% í Fáfni

Akur fjárfestingar, framtakssjóður í rekstri Íslandssjóða, hefur keypt 30% hlut í Fáfni Offshore hf. Fjárfestingin nemur 1.260 milljónum króna.

Félagið sérhæfir sig í þjónustu við olíu- og gasborpalla auk annarra verkefna á norðlægum slóðum. Fyrsta skip félagsins, Polarsyssel, var afhent félaginu í september sl. Það er fyrsta íslenska sérhæfða skipið sem sinnir öryggis- og olíuþjónustu á norðurslóðum. Skipið hefur verið til þjónustu fyrir Sýslumanninn á Svalbarða, samkvæmt fréttatilkynningu.

Fáfnir Offshore hefur gert 6 ára þjónustusamning við sýslumanninn um gæslustörf í sex mánuði á ári. Þá hefur Fáfnir einnig gengið frá samningum við stærsta fyrirtæki Rússlands, Gazprom, um þjónustu við olíuborpall í eigu félagsins sem er staðsettur í Pechora-hafinu.  

Hlutafjáraukningunni í Fáfni Offshore er ætlað að styðja við frekari vöxt félagsins. Fáfnir Offshore hefur fest kaup á öðru skipi sambærilegrar gerðar og Polarsyssel sem nú er í smíðum og verður það afhent um mitt ár 2015. Stefnt er á frekari fjárfestingar en Akur er nú stærsti einstaki hluthafi félagsins en næststærsti hluthafi félagsins er framtakssjóðurinn Horn II, segir ennfremur í tilkynningu.

Akur fjárfestir í óskráðum félögum. Hluthafar í félaginu eru 15 talsins þar af 13 lífeyrissjóðir ásamt VÍS og  Íslandsbanka.  Fjárfestingin í Fáfni Offshore er önnur fjárfesting Akurs og sú stærsta hingað til en félagið fjárfesti fyrr á þessu ári í HSV eignarhaldsfélagi sem á rúmlega þriðjungshlut í HS veitum. Fjárfestingartími Akurs er þrjú til fjögur ár en áætlaður líftími sjóðsins er átta til tíu ár og er fjárfestingageta félagsins 7,3 milljarðar.

• Blogga um frétt