„Á ferli mínum sem stjórnandi hef ég ekki lagt í vana minn að fjalla opinberlega um hvað aðrir stjórnendur eru að gera eða ekki gera. Ég ætla að halda mig við það. Verkin tala,“ segir Björgólfur Jóhannsson, forstjóri Icelandair Group, aðspurður um gagnrýni forstjóra WOW air á flugflota félagsins.
Í samtali við Viðskiptamoggann segist hann ekki gefa mikið fyrir gagnrýnina.
Líkt greint var frá í gær segist Skúli Mogensen, forstjóri WOW, ekki botna í flugflotastefnu Icelandair. Í samtali við Túrista sagðist Skúli telja að eina leiðin til að fjölga farþegum væri að nota stærri vélar á núverandi afgreiðslutímum. WOW ætlar að byggja upp flota sinn með stærri vélum sem taka að lágmarki 200 farþega. Icelandair hefur hins vegar gengið frá pöntun á sextán þotum og á kauprétt á átta vélum í viðbót, sem taka færri farþega, eða 153 annars vegar og 172 hins vegar.
Frétt mbl.is: Skúli botnar ekki í flugflota Icelandair
Björgólfur segir að Icelandair hafi horft til þess að vera með fleiri stærðir af vélum. Það opni á fleiri tækifæri til sóknar á aðra markaði. „Hjá Flugfélaginu verðum við með 37 sæta vél og 72 sæta vél, hjá Icelandair með 150, 180 og 260 sæta vélar. Þetta verður öflugri flóra til að sækja á markaði, sem við gætum ekki gert eingöngu með 757-vélinni,“ segir Björgólfur.
„Ég botna ekkert í flotastefnu Icelandair, hvorki að halda áfram að taka inn tuttugu ára gamlar vélar í núverandi árferði né að fjárfesta í þotum sem rúma færri farþega en vélarnar sem fyrir eru,“ sagði Skúli einnig og gagnrýndi þannig kaup Icelandair á notuðum vélum.
Björgólfur segir að umræðan um flugvélaflota Icelandair sé stundum á nokkrum villigötum. Aldur flugvéla helgist ekki síst af notkun.
„Aldur og slit á flugvélum er mælt af flugtímum og lendingum. Við erum svo heppin hvað varðar leiðakerfi okkar að samsetningin í þessa veru er mjög góð. Hlutfall lendinga og flugtíma er svo hagstætt hjá okkur. Lendingarnar eru hlutfallslega svo fáar að elstu 757-vélarnar eru aðeins hálfnaðar hvað líftíma varðar,“ segir Björgólfur.