Viðskipti | mbl | 19.12.2016 | 9:55

Kristján til HS Orku

Kristján starfaði áður sem sérfræðingur á lánasviði Hildu ehf., þar sem hann vann við verðmat á eignasafni félagsins.

Kristján Sigurðsson hefur verið ráðinn sérfræðingur í fjármálum hjá HS Orku en hans helstu verkefni eru umsjón með Íslenska djúpborunarverkefninu (IDDP).

Þetta kemur fram í tilkynningu frá HS Orku.

Þar kemur fram að íslenska djúpborunarverkefnið sé samstarfsverkefni um djúpborun sem leitt er af HS Orku og unnið í samstarfi við norska olíufélagið Statoil og önnur fyrirtæki innan íslenska djúpborunarverkefnisins. Íslenska djúpborunarverkefnið var stofnað árið 2000 og voru stofnendur þess HS Orka, Landsvirkjun, Orkuveita Reykjavíkur og Orkustofnun.

Kristján starfaði áður sem sérfræðingur á lánasviði Hildu ehf., þar sem hann vann við verðmat á eignasafni félagsins. Kristján er með BS-gráðu í viðskiptafræði frá Háskóla Íslands. Hann er í sambúð með Söndru Dögg Pálsdóttur, verkefnastjóra hjá RB, og þau eiga fjögur börn.