Lyfjaverslanakeðjan Lyf og heilsa skilaði hagnaði upp á 283,2 milljónir króna árið 2017 og jókst hann um rúm 16% á milli ára en hagnaðurinn árið 2016 nam 243,2 milljónum króna.
Fram kemur í ársreikningi félagsins að það hyggist greiða hluthöfum arð sem nemur 100 milljónum króna. Félagið er nánast alfarið í eigu eignarhaldsfélagsins Faxar ehf. sem á 99,56% hlut en Toska ehf. á 0,44% hlut. Bæði félögin eru að fullu leyti í eigu Jóns Hilmars Karlssonar. Hann er sonur Karls Wernerssonar sem áður átti fyrirtækið.
Rekstrarhagnaður fyrirtækisins fyrir afskriftir nam 604,5 milljónum króna árið 2017 en var 535,2 milljónir árið 2016. Fyrirtækið seldi vörur og þjónustu fyrir tæpa 7 milljarða króna árið 2017 miðað við tæpa 6,9 milljarða árið 2016, að því er fram kemur í Morgunblaðinu í dag.