Viðskipti með bréf Icelandair stöðvuð

Viðskipti með bréf Icelandair voru stöðvuð rétt áður en tilkynnt var um kaup Icelandair á WOW air. Páll Harðarson, forstjóri Kauphallarinnar segir í samtali við mbl.is að Kauphöllin hafi fengið upplýsingar um að von væri á meiriháttar tilkynningu frá útgefanda og var ákvörðun um að stöðva viðskiptin tekin með hliðsjón af því.

Viðskiptin voru stöðvuð klukkan 11:43, en tilkynning um kaupin var send á markaðinn klukkan 11:49. Páll segir að aðeins verði um klukkustundar stöðvun á viðskiptum og að klukkan 12:50 hefjist viðskipti með uppboði. Í framhaldinu, klukkan 13:00 hefjast svo regluleg viðskipti að nýju.

„Þetta er gert til að tryggja jafnræði fjárfesta á markaði,“ segir Páll og bætir við að með þessu sé tryggt að allir hafi sama aðgang að upplýsingum.

• Blogga um frétt