Heimsmarkaðsverð á hráolíu hefur hækkað mikið í viðskiptum í nótt eftir að árás var gerð á tvö olíumannvirki í Sádi-Arabíu um helgina. Vegna árásarinnar mun draga verulega úr olíuframleiðslu í landinu. Verð á Brent-olíu hækkaði um 12 bandaríkjadali tunnan sem er það mesta, í dölum talið, frá því framvirk viðskipti hófust með Brent árið 1988. Þetta er tæplega 20% hækkun en verð á WTI-hráolíu (West Texas Intermediate) hækkaði um rúma 8 bandaríkjadali eða 15%.

Verð á Brent og WTI lækkaði síðan aftur en hækkunin er engu að síður um 10% um klukkan 6 að íslenskum tíma. 

Árásin í Sádi-Arabíu var gerð af uppreisnarsveitum Húta, sem njóta stuðnings klerka­stjórn­ar­inn­ar í Íran, í nágrannaríkinu Jemen en hersveitir undir forystu Sádi-Araba hafa gert ítrekaðar árásir á Jemen undanfarin fimm ár til stuðnings við stjórnvöld í Jemen.

Olíufyrirtækið Aramco, sem er í eigu sádiarabíska ríkisins, leggur allt kapp á að koma framleiðslu aftur í gang á framleiðslusvæðum fyrirtækisins sem urðu fyrir drónaárásunum á laugardag. Þarf fyrirtækið tímabundið að leggja niður helming framleiðslu sinnar, sem er um 5% af heildarolíuframleiðslu heimsins, vegna árásanna. Donald Trump Bandaríkjaforseti heimilaði í gær að gengið yrði á varabirgðir Bandaríkjanna af olíu vegna stöðunnar sem upp væri komin.

Tengdar fréttir

Jemen

Gerðu enn aðra loftárás á Jemen

• Íranar fordæma árásina en lofa ekki hefndum
• Skutu niður eldflaugina á síðustu stundu
• Náðu að afstýra stórslysi
• Kaupskip hæft með eldflaug

» Fleiri tengdar fréttir

• Blogga um frétt