Enn hækkar bensínverð

Verð á lítra af bensíni á Íslandi nálgast 300 króna múrinn eftir hækkanir á heimsmarkaðsverði á olíu.

Frétt af mbl.is

Olíutunnan gæti farið yfir 300 dollara

Ástæða hækkunarinnar eru líkast til fréttir um að ríkisstjórn Joes Bidens, Bandaríkjaforseta, muni banna innflutning rússneskrar olíu. Líklega verður bannið formlega tilkynnt í dag, en um 8% hráolíu sem notuð er í Bandaríkjunum kemur frá Rússlandi. Erfitt verður fyrir Bandaríkjamenn að fylla upp í skarðið sem rússnesk olía mun skilja eftir sig.

Verð á Brent Norðursjávarolíu hækkaði um 5,6% upp í 130,13 dollara á tunnu í dag. Einnig hækkaði WTI hráolían um 5,3%, upp í 126,7 dollara fyrir tunnuna. Verðið hafði nú þegar verið á uppleið en eftir fréttir af áformum ríkisstjórnar Bandaríkjanna hækkaði verðið enn frekar.

Eins og er stendur lítraverðið á 95 okt bensíni í 298,9 hjá Atlantsolíu, 294,8 hjá Orkunni, 294,9 hjá ÓB, 297,8 hjá Olís, 297,9 hjá N1 en 252,9 hjá Costco í krónum talið.

Í upphafi árs stóð lítraverðið víða í 270 krónum og er það hækkun upp á um 11% frá áramótum.

• 1 blogg um fréttina

Bloggað um fréttina

• Ómar Ragnarsson: Rafvæðing bílaflotans má ekki seinni verða.